[6] EPISTOLA VI.

Cl. Viro

D. IOANNI a LASKO,

Praeposito, &c.

S. D. P.

Sic est, Cl. V. quemadmodum tibi indicavit ERASMUS noster; ausus sum summo heroi humile opusculum dicare. Sed desine queri quod nullo me tibi officio devinxeris, qui toties, quod ego magnum amicitiae signum existimo, ad mensam tuam me vocaris, ac subinde me compellaris humanissime, amoremque quendam singularem erga me semper prae te tuleris. In modo noli succensere, quod huiusmodi nugas tibi nominatim inscripserim, cui non nisi absolutissima conservare conveniebat. Rogo, si D. STANISLAUS TURZO Olomucensis Episcopus adhuc in humanis est, ad quem anno superiori longissimas literas scripsi, illi me commendes occasionem ac oportunitatem nactus. Bene vale, V. CL. & me perpetuo tuum futurum scias. Sletstadij decimo septimo die May. An. MDXXVII. cursim.

BEAT. RHENANUS.

ex animo tuus.